Obradoiros

Os obradoiros buscan que os participantes poidan experimentar de forma directa algúns dos aspectos das sociedades prehistóricas máis relacionados coa satisfacción das necesidades básicas da vida (abrigo, lume, alimentos, ferramentas) e tamén con aqueles fenómenos culturais característicos do nacemento das primeiras sociedades humanas (arte, relixión, música, agricultura, cerámica, domesticación…).

Os obradoiros están deseñados para cubrir diferentes áreas do coñecemento, con especial atención aquelas que conforman os currículos educativos. Deste xeito temos actividades centradas nas materias de historia, xeografía, coñecemento do medio, música, artes plásticas pero tamén na filosofía e na antropoloxía.

Metodoloxía

A metodoloxía de traballo empregada será dinámica e participativa, facendo as actividades o máis amenas posibles e incidindo, dun xeito pedagóxico e lúdico, no valor educativo dos obradoiros. Sabemos que a aprendizaxe é máis eficiente cando se produce a través do descubrimento e da experimentación propia. Por iso propoñemos un programa pedagóxico que busca combinar a aprendizaxe e a experimentación. Esta metodoloxía porémola en práctica utilizando como ferramenta lingüística o uso do galego, como lingua vehicular da transmisión tradicional da cultura en Galicia e como elemento fundamental do patrimonio inmaterial galego.

Os obradoiros están pensados para unha duración de 1 hora e media. A idade mínima para participares nos obradoiros é de 5 anos e o máximo serán 15 rapaces e rapazas por actividade.